بمنطقة المهاجرين في مكان امتداده حوالي 50 متر و بهالمساحة الصغيرة جداً يوجد حوالي 5 مطاعم متخصصة فقط ببيع الفلافل و أي حدا بيمرق من هالمنطقة اذا انتبه للموضوع رح يستغرب انو معقول كل مطاعم هالفلافل بهالمساحة الصغيرة جداً، لا و كلن عليهم زباين طبعا هالمنطقة مو حالة فريدة و انما كلنا مننتبه لاماكن بتتكدس فيها محلات من نوع معين جنب بعض و كأن الدنيا صغرت و ما لسا غير هالمكان، او بالصيغة الشعبية منقول انو يا لطيف هالشعب ما اضيق عينه اذا شاف واحد فتح و اشتغل الكل بيقلده و بيضارب عليه لفترة قريبة كنت فكر بنفس هالطريقة لحتى قرأت شي عن توازن ناش و اللي من خلاله قدرت افهم علمياً شو سبب هالتكدس و رح حاول اشرح الفكرة بابسط طريقة ممكنة

---

اذا فرضنا انو في شاطئ طوله 1000م و قررت أنت تعمل بسطة تبع فيها بوظة فانت رح تفكر انو افضل مكان تفرد فيه البسطة هو بنص الشاطئ و بالتالي بتغطي 500 م من كل جنب طيب رفيقك اللي عينه ضيقة قرر يفتح كمان بسطة بوظة عنفس الشاطئ فانتو كل واحد بعد عن طرف الشاطئ 250 م و فرد بسطته و بالتالي كل واحد صار عم يغطي مساحة 500 م بعد كم يوم رفيقك اللي عينه ضيقة دفش البسطة تبعه 50 متر باتجاهك و بالتالي صار عم يغطي مساحة اكبر منك و انت رحت بالجكر دافش بسطتك 100 م لتعوض الفرق و تالت يوم دفش هو كمان و باخر الاسبوع لقيتوا بعضكم بلزق بعض و هاد هو توازن ناش و كل واحد فيكم عم يخدم نفس المساحة

---

هون رح يخطر ببال حدا سؤال .. انو ليش ما بيتفقوا على التقسيم و كل واحد بيرضى بقسمه ؟ هون رح نجرب نلعب لعبة اسمها المكافأة ... و هاللعبة رح نفترض فيها انو انت موظف مبيعات بشركة و بهالسنة اخدت مع 4 من زملائك جائزة افضل بائع و اجى مدير الشركة و قرر يصرفلكم مكافأة و قال التالي : المكافأة هي أن يختار كل منكم مبلغ، أي مبلغ بين 600 الف ليرة و1 مليون ليرة، لكن بشرط واحد، وهو أن الجميع سوف يحصل على أقل اختيار من الإختيارات، مطروحاً منه الفارق بين اختياره الشخصي وهذا الاختيار. يعني لوضحلك اياها بمثال : انت اخترت 1 مليون و في حدا من زملائك اختار 700 الف فأنت رح تحصل على 400 الف فقط لانو الفارق بين 1 مليون ( اختيارك ) و 700 الف ( اختيار زميلك ) هو 300 الف و الاختيار الاقل هو 700 الف منطرح منه 300 الف ( الفارق بين الاختيارين ) فانت بتاخد 400 الف فقط مصيبة مهيك !! أول شي رح يخطرلك تقول 1 مليون بس اذا حدا من زملائك اختار 900 الف رح يطلعلك 800 الف و المصيبة اذا حدا اختار 700 الف فانت رح يطلعلك بس 400 الف لهيك بعد تفكير ( او كم خازوق ) فكل واحد منكم رح يقرر يختار مبلغ 600 الف و بهالحاله شو ما اختاروا البقية هو رح ياخد عالاكيد 600 الف ( توازن ناش ) 🙂 و طريقة التفكير هي اسمها ( الاستقراء التراجعي ) طيب هون الموضوع بسيط يعني فيكم انتو الموظفين الخمسة تتفقوا بين بعض و الكل يختار مليون بس فكر فيها على مساحة سوق العمل كاملاً و مع وجود الألاف من اللاعبين و هون من اللحظة الأولى الكل رح يفكر باللجوء للقرار الأنسب اللي ما بيتأثر بقرارات بقية اللاعبين و انسب قرار للوصول لتوازن ناش و بالتالي الجميع رح يكون عقلاني باتخاذ قراراه حتى لو كان السوق حر و مفتوح و رح يختار القرار اللي ما بيتأثر بقرار بقية اللاعبين بالسوق